हमारी छोरी का छोरा से कम है; शेफाली वर्मा टी २० क्रमवारीत अव्वल स्थानावर

भारतीय महिला क्रिकेट संघाने टी २० विश्वचषकामध्ये अप्रतिम कामगिरी करत सेमीफायनल गाठली आहे. सेमीफायनल आधीच आसीसीने बोर्डाने आयसीसी टी-20 महिला क्रमवारीची यादी जाहीर केली आहे. या यादीत भारताची अवघ्या 16 वर्षाची खेळाडू शेफाली वर्माने धमाकेदार कामगिरीच्या जोरावर अव्वल स्थानी झेप घेतली आहे. शेफाली याआधी आयसीसी क्रमवारीत 20 व्या स्थानावर होती. शेफालीच्या कामगिरीमुळे सोशल मीडियावर कौतुकाचा वर्षाव होत आहे.
बऱ्याच संघर्षांना सामोरं जात आपल्या खेळादरम्यान आलेल्या प्रत्येक संकटाला तिने जिद्दीने तोंड दिलं. इतकंच नव्हे, तर पुरुष क्रिकेट संघात ती भावाच्या अनुपस्थित त्याच्या जागी खेळली. फक्त खेळलीच नाही, तर त्या स्पर्धेत तिने सर्वोत्कृष्ट खेळाडू हा बहुमानही पटकावला. यंदाच्या विश्वचषकामध्ये शेफालीने प्रत्येक सामन्यात धडाकेबाज कामगिरी करत भारताला विजय मिळवून दिला. शेफालीने अनुक्रमे २९, ३९, ४६ तर चौथ्या सामन्यात ४७ धावा केल्या. यात तिने दोन सामन्यांमध्ये सामनावीराचा किताब पटकावल्यामुळे सध्या ती टी २० विश्वचषक स्पर्धेत १६१ गुणांसह तिसऱ्या स्थानी आहे. तिच्या या कामगिरीनेच भारताला सेमीफायनल मध्ये सहजरीत्या प्रवेश मिळाला.
भारताकडून दमदार कामगिरी करत शेफालीने जागतिक क्रमवारीत अव्वल स्थान पटकावले. यासह महिला आणि पुरूष अशा दोन्ही क्रिकेटमध्ये मिळून टी २० जागतिक क्रमवारीत अव्वल स्थान पटकावणारी शेफाली सर्वात तरूण भारतीय क्रिकेटपटू ठरली. त्याचबरोबर भारतीय संघाची माजी कर्णधार मिताली राज हिच्यानंतर टी २० क्रिकेटमध्ये जागतिक क्रमवारीत अव्वल स्थान मिळवणारी ती दुसरी महिला क्रिकेटपटू ठरली.
सचिन तेंडुलकर, वीरेंद्र सेहवाग, ब्रेट ली अशा दिग्ग्ज खेळाडूंनीही शेफालीच्या खेळाची प्रशंसा केली आहे. किरकिर्दीत वयाच्या अवघ्या सोळाव्या वर्षीच उत्तुंग शिखरावर पोहोचणाऱ्या शेफालीचं हेच यश पाहता, आयसीसीनेही तिचे कौतुक केले आहे.
भारत आणि इंग्लंड यांच्यात उद्या सेमीफायनल होणार असून तिथेही शेफाली वर्मा आणि भारतीय महिला संघ यांनी चांगली कामगिरी करून फायनल मध्ये प्रवेश करावा ही तमाम भारतीयांची इच्छा आहे त्यासाठी सर्वांना शुभेच्छा.