महाराष्ट्र सरकारने कोरोना निर्बंध हळूहळू शिथील करण्यास सुरूवात केली. त्याचा पहिला भाग म्हणून आवश्यक आणि अत्यावश्यक सेवा सुरू करण्यात आल्या. त्यानंतर मंदिरं सुरू करण्यात आली आणि राज्यातल्या शाळाही सुरू करण्यात आल्या. मधे काही अवधी घेऊन टप्प्याटप्प्याने या सगळ्यावरचे निर्बंध शिथील करण्यात आले. येत्या 22 ऑक्टोबर पासून सिनेमागृह सोबतच नाट्यगृह देखील सुरू होणार आहेत, शासनाने त्याची नियमावली सरकारने जाहीर केली आहे.
नाट्यगृहं, सिनेमा हॉल्स आणि मल्टिप्लेक्ससाठी अशी आहे नियमावली
- नाट्यगृहं, सिनेमागृहं, मल्टप्लेक्स मधली जी आसन क्षमता आहे त्या आसन संख्येच्या 50 टक्के लोकांनाच प्रवेश मिळणार आहे म्हणजे उदाहरणार्थ 500 ची आसन संख्या असलेलं नाट्यगृह, सिनेमागृहं किंवा मल्टिप्लेक्स असेल तर 250 लोकांनाच प्रवेश मिळणार आहे.
- सिनेमा, नाटक पाहण्यासाठी जात असताना आरोग्य सेतू अॅपवर स्वतः सेफ आहोत हे दाखवणं बंधनकारक असणार आहे
- आरोग्य सेतू अॅप नसेल तर दोन लसी घेतल्याचं प्रमाणपत्रही दाखवता येणार आहे
- फूड कोर्ट, क्लिनिंग सर्व्हिस या ठिकाणी काम करणाऱ्या लोकांचं, कर्मचाऱ्यांचं लसीकरण झालेलं असणं बंधनकारक. लसीचे दोन डोस घेऊन त्यांना कमीत कमी चौदा दिवस झालेले असणं बंधनकारक
- गर्दी टाळण्यासाठी मल्टिप्लेक्समधील सिनेमा शोच्या वेळांमध्ये तसे आवश्यक बदल कऱण्यात यावेत
- तिकीट बुक करत असताना डिजिटल पेमेंटला महत्व द्या, एवढंच नाही तर फूड कोर्टवरही डिजिटल पेमेंट करण्यासाठी आग्रही राहा
- पार्किंग एरियातही गर्दी होऊ नये यासाठी आवश्यक ते उपाय योजणं बंधनकारक असणार आहे. तसंच पार्किंगमधून मल्टिप्लेक्स, नाट्यगृहाकडे जात असताना थर्मल स्क्रिनिंग होणं आवश्यक. ज्यांचं शरीराचं तापमान नॉर्मल आहे अशांनाच प्रवेश दिला जावा
- कोणत्याही प्रकारचे खाद्यपदार्थ, शीतपेयं सिनेमा हॉलमध्ये घेऊन जाणं, नाट्यगृहांमध्ये नेणं यावर बंदी. विकत घेतलेले खाद्यपदार्थ पॅक केलेल्या स्वरूपात असावेत. स्क्रिनिंग हॉल किंवा नाट्यगृहाबाहेर असलेल्या मोकळ्या जागेत ते खाऊन त्यानंतर थिएटरमध्ये प्रवेश दिला जावा.
- सगळ्या कर्मचाऱ्यांचं लसीकरण झालेलं असणं बंधनकारक
